بۆکس هەواڵ ـ

ئەندامێکی لیژنەی دارایی پەرلەمانی عێراق ڕایگەیاند، لە پەرلەمان پرسیار لە تەیف سامی دەكەین لەبارەی هۆكاری دواكەوتنی موچەی فەرمانبەرانی هەرێم و موچەی مانگی حەوت یەکلایی دەکەینەوە.

د. نەرمین مەعروف، ئەندامی لیژنەی دارایی پەرلەمانی عێراق لە لێدوانێکدا ڕایگەیاند، لەسەر داوای ئێمە لە لیژنەی دارایی ئەمڕۆ هەریەكە لە وەزیرانی دارایی و پلاندانان و پارێزگاری بانكی ناوەندی عێراق ئامادەی لیژنەی دارایی عێراق دەبن.

ئاماژەی بەوەشکرد، ئێمە وەك نوێنەرانی كورد لە لیژنەی دارایی پرسیار ئاراستەی تەیف سامی دەكەین لەبارەی هۆكاری دواكەوتنی مووچەی فەرمانبەرانی هەرێمی كوردستان و مووچەی مانگی حەوت یەکلایی دەکەینەوە.

باسی لەوەشکرد، لەبارەی بابەتی نەبوونی پارەی كاش و چەند بابەتێكی دیكە گفتوگۆی لەگەڵ دەكەین، چونكە وەزارەتی دارایی عێراق خۆیان ئەوەیان بڵاوكردووەتەوە كە كێشەی پارەی نەختنینەیان نییە.