ئەدهەم بارزانی: بەفەرمانی خودی سەرۆکی پارتی رێگریم لێدەكرێت بگەڕێمەوە زێدی خۆم

کوردستان
1441 جار خوێندراوه‌ته‌وه

بۆكس هەواڵ ـ

ئەدهەم بارزانی كەسایەتی و سیاسەتمەداری كورد لە پەیامێكدا ڕایگەیاند، لە ڕۆژێكی وەكو ئەمڕۆ دا، لە  ٥-٦-٢٠٢٢، دوو ساڵ پێش ئێستا بەفەرمانێکى خودى سەرۆکى پارتى، بە پێچەوانەی یاسایەكانی كوردستان و دەستوری عێراق، لەڕێگەی هێزەوە ڕێگەیان نەدا بگەڕێمەوە بۆ زێدی خۆم و ناو ماڵ و مناڵەكانم، ئەم بڕیارە نادەستوری و نادادپەروەرییە تا ئەمڕۆ بەردەوامە كە سبەینێ دەچێتە سێهەم ساڵەوە.

هەر لەو پەیامەدا كە ئاڕاستەی رای گشتی عێراق و كوردستان و نوێنەرایەتی نەتەوە یەكگرتووەكان و قونسوڵیەت و سەفارەت و نوێنەرایەتی وڵاتان، لەهەرێمی كوردستان و عێراق و دەزگایی باڵای قەزایی عێراق كردووە ئەدهەم بارزانی ئاماژەی بۆ ئەوەش كردووە، ئاشكرایە ئەم گوشارە بۆ وەدەرنانم لەزێدی خۆم پێچەوانەى دەستورى هەمیشەیى عێراق و زەوتكردنی مافى هاوڵاتى بوونە بەبێ بوونی هیچ پاساوێكی ڕاگەیەنراوی دیاریكراو، خۆ گەر دەوترێت ئەم یاسا شكێنییە هۆکارى ئەوە بوو كە چەند هەڵوێستێكی جیاوازم لە وان نیشانمداوە، ئەوە وەك هەر هاولاتیەكی ئەم وڵاتە بە مافی خۆمی دەزانم كە جیاواز بیربكەمەوە.

دەشڵێت، ئەمە یاساشكێنی نیە، نەك بەم شێوەیەیی ئێستا وەك ئاكاری تاكڕەوی مامەڵە لەگەڵ هاوڵاتیەكدا بكرێت بەبیانوی بیركردنەوەی جیاوازەوە.

هەڵویستی من دەربارەی گیراوەكانی بادینان و لەشكركێشی سوپای توركیا بۆ ناوخاكی هەرێم و بەرگری لە مافە ڕەوایە مێژوویەكانی خۆمان كە زەۆت و پێشێل و چەواشەكراون،  بوو.

باسی لەوەشكردووە، هاوكات ئەمانە هەڵوێستی هەزاران هاوڵاتی تری ئەم نیشتمانەیە، ناكرێت و ناگونجێت لەگەڵ یاسا بەركارەكانی ئێستای عێراق و هەرێمیش لایەنێكی سیاسی بەوشێوەیە مامەڵە لەگەڵ بیروڕای جیاواز بكات و حەق بەخۆی بدات سەرتاپای خانەوادەیەك لێك دور بخاتەوە و دەربەردەر بكات..!

ئەدهەم بارزانی لە درێژەی پەیامەكەیدا ئەوەشی نوسیووە، من دادی خۆم دەخەمە بەردەم ئێوەی بەرێز، تا لەڕێگەی خۆتانەوە لێكۆلێنەوە لەم بابەتە بكەن، چونكە وەك هاوڵاتیی ئەم وڵاتە بەنیازین رۆلی سیاسی خۆمان ببینین و پاش ڕاوێژ لە گەل ھەڤاڵان و ھەواداران لە هەڵبژاردنی ئایندەی هەرێمی كوردستان رۆڵمان هەبێت و دەمەوێت لەئێستاوە لەو پرسە ئاگادارتان بكەمەوە نەبا بەو بەهانە بێ بنەمایانەوە بیانەوێت ئەو مافەشم لێ زەوت بكەن.

لە كۆتایی پەیامەكەیدا دەشڵێت، بەدڵنیاییەوە لەبەرامبەر ئەم سوكایەتی و یاساشكێنییەی بەرامبەرم كراوە بێدەنگ نابم و ڕوو دەكەمە دادگا و داوا لە سەروكی ئەنجومەنی قەزایی باڵا و دادگای فیدڕاڵی لە عێراق دەكەم بۆ وەرگرتنەوەی مافە زەوتكراوەكانم و داوا لە ھەمووی ئێوەی بەرێز و ھاوڵاتیانی كوردستان و لایەن و میدیاكاران و حزب و لایەنە سیاسیەكانی كوردستان و عێراق و دەرەوەیەكان و قەلەم بە دەستان دەكەم كە رێگربن و دەنگتان بەرز بكەنەوە بەرامبەر ئەم جۆرە حوكمڕانیە ڕەھا و بێ چاودێریە كە سبەینێ ئەم ئاگرە بەردەبێتە دامەنی ھەر تاكەكی وڵاتەكەمان.