بۆکس هەواڵ ـــــ

لە چاوپێکەوتنێکدا، ئیلهام ئەحمەد، بەرپرسی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریا، ڕایگەیاند کە سیستمی حوکمڕانی دەبێت لەسەر بنەمای ئیرادە و مافی خەڵک بێت، نەک بە زۆرەملێ و سەپاندنی ناسنامە.

ئیلهام ئەحمەد جەختی لەسەر پێویستیی بوونی "سیستمێکی ناناوەندی" کردەوە و وتی: "کاتێک سیستمێکی ناناوەندی هەبێت، چارەسەر بۆ کێشەکان دادەنرێت و کێشە ناوخۆییەکانیش وردتر چارەسەر دەکرێن."

ناوبراو ڕەخنەی لەو بیرکردنەوەیە گرت کە دەسەڵات بە تەنها لای خۆی کۆدەکاتەوە و وتی: "ئەو هۆشمەندییەی کە دەڵێت 'تەنها منم، من دەوڵەتم، من هەموو شتێکم'، دەبێت تێپەڕێنرێت."

بەرپرسی پەیوەندییەکانی دەرەوەی بەڕێوەبەرایەتیی خۆسەری ئاماژەی بەوەدا کە بنەمای بەشداریکردنی خەڵک لە بەڕێوەبردندا دەبێت لەسەر ئیرادەی ئازادی خۆیان بێت و وتی: "دەبێت خەڵک هەست بکات کە خاوەنی ماف، کەسایەتی و ئیرادەی خۆیەتی و بە ئیرادەی خۆی بەشداری لەم دەوڵەتەدا دەکات."

وەک نموونەیەک بۆ سەپاندنی ناسنامە، خاتوو ئیلهام ئەحمەد باسی لەوە کرد کە چۆن ناسنامەی عەرەبی بەسەریاندا سەپێنراوە و وتی: "من وتوومە من عەرەب نیم. نابێت بە زۆر بێت." هەروەها پرسیاری ئەوەی ورووژاند کە کاتێک باس لە بەشداریکردن لە سوپادا دەکرێت، مەبەست "کام سوپایە؟" وەک ئاماژەیەک بۆ فرەچەشنیی هێزەکان و نەبوونی متمانە بە دامەزراوەکانی حکومەتی ناوەندی.

لە کۆتاییدا، ئیلهام ئەحمەد بانگەوازی بۆ کارکردنی پێکەوەیی کرد بۆ بنیاتنانی ئەنجومەنە هەرێمییەکان و وتی: "ئەمە کارێکی قورس نییە، دەتوانین پێکەوە ئەنجامی بدەین."