وەزارەتی بەرگری ئێران: بەشێکی بەرچاو لە هێزی مووشەکیمان بەکارنەهێناوە
جیهان
بۆکس میدیاـــــ
گوتەبێژی وەزارەتی بەرگریی ئێران دەڵێ، زیاتر لە هەزار جۆر درۆن، مووشەک و کەرەستەی دیکەی سەربازی لە لایەن هێزە چەکدارەکانی وڵاتەکەوە بەرهەم هێندراون.
ئەمڕۆ شەممە، 25ی نیسانی 2026، رەزا تەلایی نیک، گوتەبێژی وەزارەتی بەرگریی ئێران گوتی، "زیاتر لە هەزار جۆر مووشەک، درۆن، سیستم و کەرەستەی جۆراوجۆر بە شێوەیەکی تەواو زانستی و خۆماڵی لە لایەن هێزە چەکدارەکان، وەزارەتی بەرگری، کەرتی تایبەت و کۆمپانیاکانی زانیارییەوە بەرهەم هێندراون."
تەلایی نیک گوتی، "ئەم توانایە ئەنجامی زیاتر لە 25 ساڵ وەبەرهێنانە لە پیشەسازی بەرگریدا بەجۆرێک تەنانەت لە ئەگەری زیانگەیاندن بە هەندێک ناوەند، پڕۆسەی بەرهەمهێنان و پشتیوانی لە سەرانسەری وڵاتدا بەردەوام دەبێت."
بە گوتەی تەلایی نیک، "لە بواری بەرهەمهێنانی چەک و کەرەستەی بەرگرییدا بەشێوەیەکی گشتی، نزیکەی 9 هەزار کۆمپانیا هاوکاری هێزە چەکدارەکان و وەزارەتی بەرگری دەکەن."
تەلایی نیک ئاماژەی بەوەش کرد، "بەشێکی بەرچاو لە هێزی مووشەکی وڵاتەکە هێشتا بەکارنەهێندراوە."
